Во крајно возбудлив натпревар во првото коло од вториот круг натпревари во Суперлигата на Македонија, ракометарите на Тинекс Пролет ремизираа (23-23) пред своите навивачи со екипата на Прилеп, откако испуштија триумф на мечот, по гол примен на само осум секунди пред крајот на натпреварот.
Избраниците на Александар Јовиќ во спортската сала „Македонско Сонце“ лошо го почнаа натпреварот, дозволувајќи гостите по само 13 минути игра да дојдат до предност од 5-8, која ја одржуваа до крајот на полувремето. На паузата ракометарите на Прилеп заминаа со предност од 12-14.
Во второто полувреме, повторно почетокот далеку од посакувањата за домашните. Прилепчани повторно наметнаа силен ритам и по само пет минути во вториот дел дојдоа до предност од 13-17, па и до 14-18. За да, конечно, следува вистинската игра на Тинекс Пролет, агресивно во одбраната со што се блокираа претходно разновидните акции на гостите. Низ таква игра брзо дојде до анулирање на предноста на гостите, па на десет минути пред крајот конечно и израмнување на натпреварот (20-20). Следеше продолжување на ритамот, па и предност од 22-20 на три минути пред крајот на дуелот.
Но, во финишот се влезе во крајно неизвесна завршница. Ракометарите на Јовиќ на една минута пред крајот дојдоа до предност и од 23-21, по што следеше сосема неочекувана деконцентрација низ последните 60 секунди. Најпрво Прилеп намали на 23-22, домашните имаа напад за сигурна победа но не успеаја да реализираат, а потоа следеше и погодокот на левиот бек на гостите Цветаноски, на само осум секунди пред крајот, за конечни 23-23.
Димковски и Бахар беа најефикасни кај Тинекс Пролет со по шест погодоци, а исто толку голови постигнаа и Цветаноски и Рајатовски кај Прилеп.
И првиот меѓусебен натпревар на двете екипи сезонава, во Прилеп, заврши без победник.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
