Ракометарите на Пролет не дозволија ново изненадување против Радовиш откако на првиот натпревар сезонава одигран, радовишани успеаја да стигнат до реми против големиот фаворит 27-27. Тимот од скопската населба овојпат без поголеми проблеми славеше на домашен терен со 34-29 во натпревар од 10. коло во Б групата во ракометната Суперлига на Македонија.
Гостите од Радовиш успеаја да се држат против фаворитот се до резултат 5-4, по што следеше серија на домашниот тим кој во еден момент стигна и до плус пет 16-11. Пред крајот на првите 30 минути следеше мало опуштање кај избраниците на Лембанов, па на пауза заминаа со позитива од само три гола 19-16. Во вториот дел радовишани успеаја да парираат само до резултат 23-21. Во последните 15 минути следеше голем пад, па на крајот Пролет стигна до лесен триумф од 34-29. Михаил Аларов со шест погодоци беше најдобар поединец кај победникот, додека кај поразените недоволни беа деветте гола на Јакша Вештица.
Без проблеми поминаа и ракометарите на Бутел кои славеа на гостувањето кај Струга со 19-27. Гостите од скопската населба уште во првото полувреме ги разрешија дилемите околу победникот бидејќи на пауза заминаа со големи плус осум 8-16.
Во второто полувреме домаќините заиграа подобро и во еден момент успеаја да стигнат до негатива од три гола 16-19, но тоа беше се што направија во мечот. До крајот гостите го исконтролираа резултатот за конечни 19-27. Марко Мајиќ со девет гола беше прво име во таборот на победникот, додека кај Струга со пет гола заврши Петар Бугариновиќ.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
