Творците на документарниот филм „Патот на Кобра до ѕвездите“, посветен на најголемото фудбалско име во македонската историја Дарко Панчев денеска во Универзитет Скопје одржаа прес-конференција на која го претставија документарецот кој официјална промоција ќе има во понеделник, 24. април, кога и ќе ја доживее светската премиера.
Под генерално покровителство на Универзитетот за туризам и менаџмент, сега со ново име Универзитет Скопје, овој филмски документ со историска вредност за македонскиот спорт е соорганизација и копродукција на Спорт клуб телевизија, Спортско радио 90,3 и Спорт нетворк продукција. На прес-конференцијата, присуствуваше секако ѕвездата на филмот, Дарко Панчев, како и проф. д-р Аце Миленковски, ректор на Универзитетот Скопје (УТМС).
„Создадовме еден филм за детството на Дарко, неговиот раст и фудбалски развој се на патот до успехот, и не само според неговите сеќавања туку и сеќавањата на многу други личности, негови блиски и од неговото опкружување. Дарко е многу благодарен соговорник, но и многу незгоден затоа што се сеќава на многу детали. Просто е неверојатно како Дарко се сеќава на се од неговата фудбалска кариера, затоа и со самото тоа ни беше навистина лесно, но во исто време малку и понапорно да собереме се на едно место, и во секој случај да создадеме, мислам, навистина прекрасен документарен филм кој засекогаш ќе сведочи за една големина каква што е Дарко Панчев“ – истакнаа од Спорт клуб, творците на документарниот филм за македонскиот фудбалер на векот.
„Патот на Кобра до ѕвездите“ е филм за подемот на македонскиот спортски бренд Дарко Панчев до европскиот и до светскиот трон. Панчев е еден од најдобрите голгетери на светот во осумдесеттите и на почетокот на деведесеттите години на минатиот век и еден од најпознатите македонски спортисти во историјата. Тој е носител на Златната копачка за најдобар стрелец во Европа и на Сребрената топка за најдобар фудбалер. Прогласен и за фудбалер на Македонија на 20. век, вистинска гордост на македонскиот спорт.
„За мене е секако чест и задоволство што кариерата ќе и биде претставена и на ваков начин на филмско платно. Ми беше задоволство да соработувам со продуцентите на филмот, и се надевам дека ќе и се допадне на целокупната македонска и балканска јавност. Искрено, може да направите се што сакате, но документарец се прави само ако имате што да прикажете и кажете во него. Овој документарец секако дека е круна на се што се случи во мојата кариера. Исто така се работи и на моја автобиографска книга. Драго ми е што луѓето се сетија да ја искористат целата моја богата кариера и да направат еден интересен филм“ – истакна Панчев на прес-конференцијата.
Филмот, преку гостувања на истакнати спортски и јавни личности, како и на самиот Панчев, ја раскажува неговата животна приказна на фудбалските терени, до врвот на светскиот фудбалски трон.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
