Францускиот првак Пари Сен Жермен испрати официјална жалба до УЕФА за судењето на Дениз Ајтекин на мечот против Барселона што го загубија со 6-1 и беа елиминирани од Лигата на шампионите. Французите испратиле жалба документирана на десет страници, а се жалат на дури седум погрешни одлуки на германскиот судија во клучни ситуации. Испратено е и мнение од судиски експерти за истите ситуации од натпреварот.
ПСЖ смета дека е „украден“ од Ајтекин за следните ситуации:
1. Играње со рака на Маскерано во домашниот шеснаесетник. Ајтекин тоа не го гледа, а е оддалечен само 18 метри.
2. Втор жолт картон за Пике, кој не му е доделен, при опасен старт над Кавани, кога Барселона имаше водство од 2-0.
3. Ајтекин досуди пенал за Барселона при падот на Нејмар, но Муние претходно самиот се сопна, а Бразилецот тоа го искористи за да падне над него и да „одработи“ удар од белата точка. На судиите (учествуваше и судијата зад голот) им беа потребни дури 17 секунди за да досудат пенал.
4. Судијата не му даде црвен картон на Нејмар за агресивно однесување и удирање на противнички играч без топка при резултат 3-1 за Барселона.
5. Пике играше со рака во 78.минута, по нафрлувањето на Анхел Ди Марија.
6. Недосуден пенал и црвен картон за Маскерано по прекршокот над Ди Марија. И самиот Маскерано призна дека направил фаул.
7. Луис Суарез во 90.минута одглуми пенал, по кој Барселона поведе со 5-1. Тој требало да добие жолт картон за симулирање во оваа ситуација.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
