Женската ракометна репрезентација на Македонија по пауза од една деценија се враќа на големите собири, откако на крајот на годинава заедно со Црна Гора и Словенија ќе биде домаќин на Европското првенство.
Денешната ждрепка во Љубљана ќе ги даде противниците на нашата селекција во групата Ц која ќе се игра во Скопје. Селекторот на „црвено-жолтите“, Љубомир Савевски вели дека иако сите говорат дека Полска и Швајцарија се најповолните противници кои можеме да ги добиеме, на овој шампионат нема слаби репрезентации.
„Сите велат дека најповолно за нас ќе биде да ги извлечеме Полска и Швајцарија. Сепак, желби се посакуваат за Нова година. Ова е првенство со 16 најквалитетни репрезентации од целиот континент и едноставно не може да ви се падне слаб противник. Да точно е дека Полска и Швајцарија се за нијанса послаби репрезентации од сите други, но сепак и тие имаат голем број квалитетни ракометарки кои играат во најдобрите европски тимови. Наша цел е добро да се подготвиме за шампионатот и да се прикажеме во најдобро светло пред македонската публика“, изјави Савевски.
Ждрепката за Европското првенство 2022 година во Македонија, Црна Гора и Словенија е денеска со почеток во 17 часот.
ШЕШИРИ НА ЖДРЕПКАТА ЗА ЕП 2022:
1. Шешир: Норвешка, Франција, Данска, Холандија
2. Шешир: Црна Гора (Д група), Шведска, Унгарија (А група), Полска
3. Шешир: МАКЕДОНИЈА (Ц ГРУПА), Словенија (Б група), Хрватска, Германија
4. Шешир: Шпанија, Романија, Србија, Швајцарија
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
