Стефан Ристовски за првпат беше стартер на еден натпревар во Лигата на шампионите, а неговиот Спортинг успеа да освои бод на дуелот против Јувентус, ремизирајќи 1-1. Македонскиот репрезентативец одигра добро на позицијата десен бек, домаќините по првиот дел имаа водство, но тоталната офанзива на „старата дама“ во вторите 45 минути вроди со плод кога Игуаин од непосредна близина го совлада Руи Патрисио. Ристовски беше на теренот се до 91. минута, кога од тактички причини му го препушти своето место на Петровиќ.
Англискиот првак Челси претрпе убедлив пораз од 3-0 на гостувањето против Рома, на враќањето на Антонио Конте во татковината. Италијанскиот стратег немаше одговор за тактиката на „волчицата“, откако целиот план му падна во вода за помалку од една минута, колку што му беше потребно на Ел Шарави да го отвори резултатот. Азар промаши зицер за експресно да донесе израмнување, по што римјаните постигнаа два нови погодоци, преку Ел Шарави и Пероти, и да се искачи на првото место во својата група.
Атлетико уште еднаш се посрамоти на дуелите со Карабах, овојпат не успевајќи ниту во Мадрид да го совлада шампионот на Азербејџан. Гостите изненадувачки го завршија првото полувреме со предност од 0-1, на 1-1 со еврогол израмни Томас во 56. минута, а на шпанскиот тим не му помогна ниту што триесетина минути настапуваше со фудбалер повеќе на теренот
Манчестер јунајтед обезбеди пласман во осминафиналето откако вечерва забележа нова победа над Бенфика, изразена со 2-0. Голманот Свилар беше во главна улога и на овој натпревар, најпрвин бранејќи му пенал на Марсијал, за пред крајот на првото полувреме да си постигне автогол, откако по ударот на Матиќ топката удри во дирекот, па од неговиот грб се врати во мрежата. Конечните 2-0 ги постави Дели Блинд од пенал во 78. минута.
ПСЖ рутински ја оправда фаворитската улога против Андерлехт триумфирајќи со 5-0, но изненадувачки хет-трик не постигна еден од напаѓачите туку левиот бек Курзава, додека по еднаш меѓу стрелците се запишаа Верати и Нејмар.
Баерн Минхен и без половина тим успеа да слави на гостувањето против Селтик, со голот на Хави Мартинез постигнат во 77. минута.
Барселона одигра само 0-0 на гостувањето против Олимпијакос, а уште поголем проблем за тренерот Валверде претставува повредата на Серхио Роберто, кој мораше да биде заменет уште во првото полувреме.
ГРУПА А: Манчестер ј – Бенфика 2-0, Базел – ЦСКА М. 1-2
ТАБЕЛА: Манчестер ј. 12, Базел 6, ЦСКА М. 6, Бенфика 0.
ГРУПА Б: ПСЖ – АнДерлехт 5-0, Селтик – Баерн М. 1-2.
ТАБЕЛА: ПСЖ 12, Баерн М. 9, Селтик 3, Андерлехт 0.
ГРУПА Ц: Рома – Челси 3-0, Атлетико М. – Карабах 1-1
ТАБЕЛА: Рома 8, Челси 7, Атлетико М. 3., Карабах 2.
ГРУПА Д: Спортинг – Јувентус 1-1, Олимпијакос – Барселона 0-0.
ТАБЕЛА: Барселона 10, Јувентус 7, Спортинг 4, Олимпијакос 0.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
