Роберт Просинечки е именуван за селектор на фудбалската репрезентација на Киргистан, објави националната фудбалска федерација на оваа земја. Искусниот хрватски стручњак потпиша едногодишен договор, со можност за продолжување за уште една сезона. После тоа, соработката може да се продолжи за дополнителни три години, под услов тимот да постигне добар резултат на Азискиот куп во 2027 година.
Претседателот на Фудбалската федерација на Киргистан, Камчибек Ташиев, изјави дека договорот со Просинечки е постигнат брзо и без поголеми тешкотии. Тој изрази уверување дека новиот селектор ќе внесе свежа енергија, ќе го подигне квалитетот на играта и ќе ги подобри резултатите, како и целокупната организација на репрезентацијата.
Киргистан моментално е 104-ти на ранг-листата на ФИФА. Во квалификациите за Светското првенство во 2026 година, тие застанаа во третата фаза. Во групата А од азиските квалификации, го освоија петтото место од шест екипи, со осум бода. Иран, Узбекистан, ОАЕ и Катар беа пред нив, додека Северна Кореја остана зад нив.
Просинечки во септември доби отказ од функцијата селектор на Црна Гора. Пред тоа, тој ги водеше и репрезентациите на Азербејџан и Босна и Херцеговина.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
