Крунисувањето на Родри со „Златната топка“ за 2024 година предизвика бура во фудбалската јавност, но скромниот ас на Манчестер Сити не сака да навлегува во конфликт по бунтот на Реал Мадрид и сите фудбалери на „кралскиот клуб“ откако Винисиус не го доби големото признание.
„Дали му се лутам на Реал или на некого од клубот? Зошто да им се лутам, тоа беше мој момент, за да уживам со моите најблиски, со семејството. Последно нешто за што би размислувал е луѓе што бе биле таму. Целата ситуација беше навистина луда, изгледаше дека Винисиус сигурно ќе победи, но јас секако ќе заминев да бидам дел од церемонијата, бидејќи не добиваш секој ден покана да бидеш дел од тој спектакл. Дури на денот на свеченоста, откако стигнав во Париз, почнав да добивам пораки со честитки. Јас победив и горд сум, но сакам да изразам почитување до сите оние од минатото кои не стигнале до ова признание. Говорам од срце кога велам дека многу подобри играчи од мене не ја освоиле Златната Топка, иако можеби заслужиле во одреден момент од своите кариери“, изјави Родри.
Шпанецот мина неколку сезони во Ла Лига пред да се пресели во Манчестер Сити, имаше можност низ кариерата да игра и против Меси и против Роналдо, па во истото интервју Родри го даде своето мислење и на вечната дебата „Кој е најдобриот фудбалер во историјата“.
„Меси е најдобриот фудбалер што некогаш одел по земјата, немам никаква дилема околу тоа. Кристијано во многу сегменти беше еднаков на Лео, но Меси го има вродениот талент што ниту еден друг во светот не може да му парира. Ние кои имавме можност да играме против двајцата јасно можевме да ја увидиме разликата. Не сакавме Роналдо да ни влезе во шеснаесетникот бидејќи таму е смртоносен за противниците. А Лео? Тој е смртоносен каде и да се наоѓа на теренот. Кога прв пат играв против него тргнав да му ја земам топката, ме избегна како бик во корида. Тој е неповторлив и убеден сум дека е најдобриот фудбалер на сите времиња“, истакна добитникот на „Златната топка“ за 2024 година.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
