На Кристијано Роналдо сосема очекувано воопшто не му е сеедно што остана без запишан погодок во победата на Португалија од 2-0 против Уругвај.
Роналдо во 54. минута се обиде да си припише погодок за 1-0, споделувајќи екстремна радост по постигнатиот погодок кој на крајот ФИФА му го запиша на Бруно Фернандеш затоа што, согласно и видео-снимките, јасно е дека Роналдо не ја допре топката по нафрлувањето на Фернандеш.
Но, Роналдо со своите реакции по крајот на мечот очигледно покажа дека не му е сеедно што нема гол, а и што не успеа во финишот да стрела и од пенал затоа што беше предвреме заменет. Кристијано по завршувањето на дуелот на своите соиграчи постојано им покажуваше дека тој ја допрел топката пред да заврши во мрежата за 1-0.
А, за разлика од него Бруно Фернандеш истакна дека најмалку е важно кој го постигнал голот, но важно е што Португалија е во осминафиналето.
„Да бидам искрен, мене не ми е многу важно тоа. Најважно е што минавме понатаму, тоа беше главната цел. Ако ме прашувате за тоа мислам дека Роналдо навистина ја допре топката при првиот гол“ – изјави Бруно.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
