Меѓународниот олимписки комитет го одобри учеството на руските и белоруските спортисти на Зимските олимписки игри во 2026 година во Милано и Кортина, но под неутрално знаме, повторувајќи го моделот од Париските игри.
Ова значи дека спортистите можат да настапат индивидуално под неутрално знаме, под услов да немаат врски со војската и јавно да не ја поддржале инвазијата на Украина.
„Извршниот одбор ќе го има истиот пристап како во Париз“, изјави новата претседателка на МОК, Кирсти Ковентри.
Одлуката, која се очекуваше со месеци, беше донесена на состанок во Милано. За време на изборите во март, Ковентри нагласи дека е важно сите спортисти да бидат претставени, но со почитување на принципите на МОК. На Олимписките игри во Париз, присуството на Русите и Белорусите беше ограничено на 25 спортисти, кои освоија пет медали.
Во голем дел, големината на делегациите во Милано и Кортина ќе зависи од меѓународните спортски федерации, кои продолжуваат да применуваат разни мерки, а некои сè уште го забрануваат учеството на Русите и Белорусите.
Меѓу нив се Меѓународната скијачка федерација, биатлонот и санкањето, додека еден спортист по нација е дозволен во дисциплините на лизгање.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
