Новак Ѓоковиќ триумфираше во 2. коло од Отвореното првенство на Австралија, против Италијанецот Франческо Маестрели со 3-0, во сетови 6-3, 6-2, 6-2.
Ѓоковиќ го наметна ритамот од самиот почеток и ја покажа разликата во квалитетот.
Иако Маестрели се обидуваше да остане во сетот преку подолги размени, српскиот тенисер трпеливо чекаше на можноста и стигна до брејк во раната фаза од натпреварот.
Со безбедни сервис гемови, Новак го донесе првиот сет до крај без поголеми проблеми, а во вториот сет, Ѓоковиќ дополнително го подигна нивото на својата игра. Раниот брејк му овозможи помирно да го контролира текот на сетот, додека на Италијанецот му беше сè потешко да најде решенија во размени од основната линија. На крајот Србинот дојде рутински до победата.
Во третото коло, Ѓоковиќ ќе се сретне со Ботик ван де Зандшулп, кој го победи Јунченг Шанг.
На Ѓоковиќ сега му е потребен само уште еден триумф за да стигне до својата 400-та победа на Грендслем турнирите.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
