Македонската пливачка Сара Јанковиќ прва стартуваше од македонските претставници на Светското првенство во кратки, 25-метарски, базени кое денеска стартуваше во Будимпешта, Унгарија.
16-годишната Сара пливаше квалитетна трка во квалификациите на 400 метри слободно, притоа завршувајќи со време од 4:22.11 минути, што е за речиси шест секунди подобро време од нејзиното најдобро со кое беше пријавена на СП во Будимпешта.
Македонската пливачка заврши како четврта меѓу осум натпреварувачки во својата група, на крајот за 34.место во конкуренција на 41 пливачка во оваа дисциплина. Својот втор настап Јанковиќ ќе го има на 15 декември, на двојно пократката патека од 200 метри.
Покрај Сара, Македонија на Светското првенство ќе биде претставувана уште и од Олимпиецот Никола Ѓуретановиќ кој ќе плива на 400 и 800 метри слободно, како и Јован Јанковски кој ќе настапи во трките на 100 метри слободно и пеперутка.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
