Маурицио Сари со право беше задоволен откако Лацио славеше на гостувањето против Монца со 0-2, продолжувајќи ја победничката серија и зацврстувајќи се на второто место на табелата.
Монца е тимот што сезонава го зеде скалпот на неколку фаворити, но „лацијалите“ одговорија на предизвикот и со цел плен се враќаат дома.
„Игравме против квалитетен тим, Монца е екипа што знае да диктира темпо на периоди и со тоа да создава сериозни проблеми. Ние одигравме добар меч, го контролиравме резултатот и ја завршивме работата“, изјави Сари.
Потоа, поранешниот тренер на Наполи и на Јувентус најави дека е подготвен да потпише нов долгогодишен договор со римскиот клуб.
„Ако не се случи нешто непредвидено, јас ќе останам во Лацио и во наредната сезона, за која имам договор. Секако, би потпишал и нов ако ми биде понуден. Да бидам искрен, би останал во Лацио цел живот, во овој клуб се чувствувам важен и тоа ми годи“, прокоментира искусниот стручњак.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
