Баражот за одење на Мундијалот требаше да се игра следниот месец во Москва, но големи се шанси тоа да не се случи. Планирано е во полуфиналните дуели да ги одмерат силите Русија – Полска и Чешка – Шведска, а натпреварите треба да се играат во Москва.
Меѓутоа, откако Русија ја започна војната против Украина, многу земји воведоа санкции, барем на спортски план, против Русија и одбија да играат против оваа репрезентација.
Полјаците веќе јасно ставија до знаење дека не сакаат да играат во полуфиналето од баражот против Русија, а денеска и официјално шведскиот фудбалски сојуз соопшти дека донел уште поригорозна одлука.
Швеѓаните порачаа дека нема шанси да патуваат во баражот во Москва, но и дека воопшто не сакаат да играат против Русија, без разлика каде би се одиграл тој натпревар.
Шведска и Русија можат да се сретнат во финалето на плеј-офот доколку победат во полуфиналните мечеви, а Швеѓаните рекоа дека веќе донеле јасна одлука дека не сакаат да ја искористат можноста да играат натпревар против Русија без разлика каде е тоа место.
„Репрезентацијата на Шведска нема да игра против Русија каде и да се одигра таков натпревар. Нашата федерација се согласува со предлогот ФИФА да го откаже плеј-офот во кој Русија е учесник“, соопштија од Шведската фудбалска федерација.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА