Доколку Килијан Мбапе не игра во вторник во Манчестер во Лигата на шампионите, или во недела против Атлетико Мадрид, Реал Мадрид би можел да одбие да го пушти во француската репрезентација, под услов клубот да достави медицински извештај со кој ќе се потврди повредата, пишува Мундо Депортиво во текст насловен како „Се подготвува голем скандал со Мбапе“.
Францускиот напаѓач започна со тренинзи вчера за да се види дали може да биде подготвен за реваншот од Лигата на шампионите против Манчестер Сити. Во исто време, неговата подготвеност се следи пред мадридското дерби против Атлетико Мадрид, кое ќе се игра на „Сантијаго Бернабеу“ следната недела. Ова се два исклучително важни натпревари за Реал Мадрид, но и за самиот Мбапе, најмногу поради репрезентативната пауза што започнува на 23 март.
За време на тој репрезентативен собир, францускиот селектор Дидие Дешамп планира да го покани напаѓачот на Реал Мадрид во француската репрезентација. Закажани се два пријателски натпревари – против Бразил во Бостон и три дена подоцна против Колумбија во Вашингтон. Средбата со Бразил има и големо комерцијално значење, бидејќи се планирани промотивни активности со производителот на спортска опрема што ги опремува двете репрезентации. Сето ова се одвива во САД, земјата што наскоро ќе биде домаќин на Светското првенство, каде што Мбапе игра важна промотивна улога.
Проблем може да се појави ако францускиот напаѓач ги пропушти тие натпревари поради повреда. Реал Мадрид потоа би можел да одбие да го пушти играчот на собирот на репрезентацијата ако медицинскиот извештај потврди повреда на коленото, што би му овозможило на Мбапе дополнителни десет дена за закрепнување.
Според правилата на ФИФА за статусот и трансферот на играчи, клубовите се должни да ги пуштат своите регистрирани играчи во репрезентациите на земјите за кои имаат право да играат, доколку бидат поканети од националната асоцијација. Ослободувањето на играчите е задолжително за натпреварите што се во меѓународниот календар на ФИФА, а оваа репрезентативна пауза е токму дел од тој распоред.
Сепак, постои исклучок во случај на повреда на играчот. Ако клубот достави медицински доказ дека фудбалерот е повреден, тоа може да го спречи да оди на репрезентативниот собир. Вакви случаи веќе има во минатото. Француската фудбалска федерација има право да побара Мбапе да дојде во Клерфонтен на лекарски преглед, каде што би го прегледале лекарите на репрезентацијата. Правилата исто така предвидуваат дека, на барање на играчот, тој преглед може да се изврши во земјата каде што е регистриран неговиот клуб.
Доколку Килијан Мбапе не игра за Реал Мадрид следната недела, ситуацијата би можела да стане доста чувствителна. Токму затоа францускиот напаѓач се обидува што поскоро да биде целосно подготвен, за да може да му помогне на својот клуб, но и без никакви проблеми да се приклучи на француската репрезентација.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
