Седум млади фудбалери, членови на Академијата на ФФМ, меѓу 13 до 15 години добиле симптоми на труење од храна која ја консумирале вчера во трпезаријата на Фудбалската федерација на Македонија-ФФМ, информираше Државниот санитарен и здравствен инспекторат (ДСЗИ) кој за случајот бил известен од Центарот за јавно здравје-Скопје.
Храната била обезбедена од кетеринг-служба на ДПТУ Форцашпед ДООЕЛ Скопје, Подружница Галакујна на бул. „Србија“ во Аеродром. Објектите на подружницата се веднаш затворени и забраната ќе трае додека не бидат обезбедени соодветни епидемсики мерки – генерално механичко чистење на просторот и опремата, дезинфекција од овластена здравствена установа, вонреден санитарно-хигиенски прегледи на вработените и контролни брисеви од работни површини и опрема.
ДСЗИ соопшти дека децата побарале лекарска помош во приватна поликлиника во Скопје со симптоми како гадење, тежина во стомак, пролив, главоболка, вртоглавица, но со полесна клиничка слика.
„Од вкупно 54 деца, тројца тренери и еден доктор кои јаделе од истата храна, на тегоби се пожалиле 45 деца. Шест од децата кои не ја консумирале истата храна немаат вакви тегоби. Сите заболени во епидемиолошката анкета дале податок дека претходниот ден, 9. август, консумирале ручек и вечера во трпезаријата на ФФМ“ – информираат од Инспекторатот.
Екипи од Центарот за јавно здравје и инспектори од Агенција за храна и ветеринарство денеска извршиле вонреден инспекциски надзор во Подружницата Галакујна и констатирале дека има санитарни книшки за седум вработени со уредно извршени здравствено-хигиенски прегледи, а во јуни годинава била извршена превентивна дезинфекција, дезинсекција и дератизација. Во тек на надзорот, како што се наведува во соопштението, земени се материјали за бактериолошки мониторинг, односно брисеви и мостри од храна.
Инаку, токму вчера генарациите 2004. и 2005. од фудбалската Академија на ФФМ официјално се вселија во новиот дом, сместувачкиот капацитет во комплексот „Куќа на фудбалот“. Објектот во склоп на комплексот „Куќа на фудбалот“ во себе содржи сместувачки капацитет за учениците од ФФМ/УЕФА Елитната академија, како и за младите национални тимови.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
