Пелистер експресно најде решение за тренерската позиција откако Милан Стојановски си поднесе оставка по последниот пораз од Струга ТЛ.
За многумина очекувано, Марјан Секуловски е стратегот што ќе го води Пелистер во клучните битки за опстанок откако денеска потпиша договор со „зелено-белите“ до крајот на оваа сезона. Станува збор за поранешен играч на Пелистер кој неколку пати во минатото беше и тренер на битолчани, кој го прифати предизвикот што го носат наредните два месеци во ПМФЛ.
„Марјан Секуловски од денес е нов тренер на Пелистер и ќе го води тимот до крајот на оваа сезона. ФК Пелистер повикува на обединување во последните два месеци од сезоната за исполнување на клупските цели. Нашата идеја е сите структури во клубот и градот да пулсираат исто за на последните девет натпревари оваа сезона Пелистер биде оној вистинскиот.
Затоа решението за излез од кризниот период го побаравме во нашите редови. Како и сите големи клубови се потпревме на оние кои најдобро знаат што е Пелистер, како се менаџира тежок период во клубот и кој е патот за излез од кризата.
Секуловски е дете на клубот, долги години играше и во водеше тимот, а својата професионала кариера го однесе во Победа, 11 Октомври, Новаци, Силекс, Македонија Ѓорче Петров, Брегалница, Мјанмар, Малдиви, Бангладеш…
Секуловски во изминатите 8 месеци во клубот е поставен како координатор на школата.
53-годишниот Секуловски в среда ќе го одржи првиот тренинг, а ќе дебитира на 4 април против првакот Шкендија“, објави битолскиот прволигаш.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
