Хулијан Алварез го напушта Атлетико Мадрид по две години и ја продолжува кариерата во Барселона по Светското првенство. Барем така тврди аргентинскиот новинар Уго Баласоне.
Според него, 26-годишникот веќе има договор со каталонскиот гигант, а клубовите веќе се „договориле“ за цената на трансферот.
„Хулијан Алварез ќе игра за Барселона по Светското првенство. Вредноста на трансферот ќе биде околу 70 милиони евра. Неговото време во Атлетико Мадрид завршува“, истакнува аргентинскиот новинар.
Тој ги објасни и причините зошто Алварез одлучил да го напушти мадридскиот клуб со кој е под договор до летото 2030 година.
„Едноставно, тој сака да се приклучи на подобар тим, каде што може да освои повеќе трофеи. Имаше интерес и од Арсенал, но тој ќе игра за Барселона.“
Барса би добила навистина спектакуларно засилување во Алварез. Станува збор за врвен играч кого Атлетико го купи од Манчестер Сити во летото 2024 година за 75 милиони евра.
Во претходниот дел од својата кариера, тој одигра 92 натпревари за Атлетико со учинок од 42 гола и 14 асистенции. Претходно, за две години во Сити, каде што беше претежно резервна опција, постигна 36 гола со 19 асистенции во 103 настапи.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
