Капитенот на Струга ТЛ, Буњамин Шабани вели дека неговиот тим е максимално подготвен за утрешната четвртфинална пресметка со Гостивар во Купот на Македонија, без разлика на лошиот старт на тимот и двата порази на стартот од пролетниот дел од сезоната.
Во првото пролетно коло, Струга ТЛ загуби минимално со 1-0 токму од Гостивар, но Шабани вели дека сега очекува да биде сосема поразличен натпревар.
„Ни претстои многу важен натпревар во кој влегуваме по лошите резултати на стартот од пролетта. Сепак, тоа е веќе минато и мора што поскоро да ги заборавиме тие мечеви и да се мобилизираме за утрешниот натпревар против Гостивар. Верувам дека на овој натпревар ќе дадеме максимум за да дојдеме до нашата цел. Играме против многу квалитетна екипа, имаме респект за Гостивар, но потребна ни е победа за да ни ја врати самодовербата и за првенството“ – вели Буњамин Шабани, и дополнува:
„Мислам дека имаме квалитет да дојдеме до триумф. Многу ни е важно во оваа фаза да го поминеме Гостивар, а потоа да размислуваме за финалната фаза од Купот, но и за првенството, каде се уште не сме го кажале последниот збор, со оглед на тоа што има уште многу натпревари до крајот“.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
