Струга Трим Лум не го започна најдобро пролетниот дел од првенството во Првата лига. Во првите три кола освои само еден бод, а денеска ја очекува дерби-дуел против Вардар. Можеби тимот ќе реагира против противник од највисоко ниво и ќе започне серија победи за повторно да се вклучи во трката за шампионската титула, според размислувањата на капитенот Буњамин Шабани.
„Иако не стартувавме како што посакувавме, работевме напорно за да им се вратиме на победите и мислам дека дојде вистинскиот момент да почнеме да победуваме и да се вратиме на позитивните резултати“, вели капитенот Буњамин Шабани. „Вардар е лидер на табелата и има квалитетни фудбалери, но и ние имаме одличен колектив што може да се носи со секој противник“, истакна „десетката“ на Струга ТЛ.
Шабани ја остави зад себе повредата што го оддалечи од терените во првите три кола. Неговото присуство на денешниот натпревар сигурно ќе претставува дополнителна сила за тимот, имајќи ги предвид неговите квалитети и искуство.
„Ги пропуштив првите натпревари поради повредата што ја добив во подготвителниот период, но сега тоа е зад мене и подготвен сум да го дадам максимумот и да му помогнам на тимот“, додаде Шабани.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
