Шефот на стручниот штаб на Шкендија, Артим Шаќири нагласи дека во редовите на тетовскиот тим нема ниту најмало опуштање пред утрешниот реванш-натпревар од 2. квалификациско коло во УЕФА Конференциската лига кој се игра во Скопје.
Шкендија по првиот дуел во Рига има предност од 2-1 против летонската Валмиера, но посакува триумф и утре на домашен терен.
„Подготвени сме за тоа што не чека утре. Воопшто не се залажуваме со предноста од 2-1 која ја имаме од првиот натпревар од Рига, па влегуваме во мечот од нула. Мора да се одигра максимално фокусирано на утрешниот дуел и секако желбата е нова победа и пласман во следната рунда натпревари“ – истакна Шаќири на прес-конференцијата во Скопје, притоа дополнувајќи:
„Најголемата опасност по нас се напаѓачите на Валмиера. Тие се брзи, ефикасни, но добро се спротиставивме на нивниот напад во Рига. Сега повторно мора да бидеме внимателни во одбраната, а притоа секако ќе се надигруваме максимално во офанзивата во желбата за победа. Би сакал и навивачите да ни бидат дванаесетти играч на натпреварот. Сакаме поддршка од нив, и на терен и утре во Скопје да покажеме дека не беше воопшто случајна онаа победа од пред седум дена во Летонија“.
Реванш-натпреварот меѓу Шкендија и Валмиера од 2. квалификациско коло во УЕФА Конференциската лига се игра утре со почеток од 20 часот на националната арена „Тодор Проески“ во Скопје.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
