Шкендија разочара на гостувањето против ТНС во Велс на реванш дуелот од 1. квалификациско коло за Лигата на шампионите, но благодарение на убедливата победа од 5-0 од првиот меч во Скопје, сепак продолжува со европските настапи ова лето.
Разочарувачки, тимот на Ќатип Османи загуби со 4-0 (3-0) на реванш дуелот во Велс и тоа по очајно одиграни први 30 минути од натпреварот во кои „црвено-црните“ примија дури три гола од ТНС. Последниот четврти следеше во последните секунди од мечот.
Османи се одлучи да го стартува мечот без двајцата свои најдобри фудбалери во нападот Бесарт Ибраими и Марјан Радески, и тоа не донесе позитивна свежина за Шкендија.
Велшаните дојдоа до предност со голот на Дин Еби во 15. минута од средбата…
Во 30. минута Редмонд зголеми на 2-0, а Кабанго во 35. минута веќе донесе предност од неверојатни 3-0 за ТНС…
Во второто полувреме подобро игра на тетовци, посебно и со влегување на Бесарт Ибраими и Марјан Радески.
Сепак, домашните беа тие кои имаа повеќе шанси и за четврти гол но за среќа не успеаја да стигнат до него во почетните минути од вториот дел. Конечно постигнаа четврти гол за 4-0 во 96. минута преку Куртис Бирн.
Но, и тие 4-0 на ТНС не беа доволни да ја елиминираа Шкендија која може да биде среќна што ќе игра во 2. квалификациско коло за Лигата на шампионите. А таму Шкендија ќе го чека подобриот од мечот меѓу молдавски Шериф Тираспол и грузискиот Торпедо. По првиот меч, кој се играше во Грузија, Торпедо има предност од 2-1 а реваншот се игра утре од 19 часот во Молдавија.
Како и да е, Ќатип Османи и неговите фудбалери добија сериозна шлаканица во Велс добра за освестување пред продолжението на европските натпревари!
ЛИГА НА ШАМПИОНИ – ПРВО КВАЛИФИКАЦИСКО КОЛО (реванш меч)
ТНС (Велс) – ШКЕНДИЈА (МКД) 4-0 (3-0)
Вкупен резултат: 4-5
Стрелци: Дин Еби 15′, Редмонд 30′, Кабанго 35′, Бирн 96′ (ТНС).
ТНС: Харисон, Мериот, Холанд, Кабанго, Ратлиџ, Редмонд, Хадсон, Мулан, Еби, Луис, Едвард
Тренер: Скот Раско
ШКЕНДИЈА: Захов, Бејтулаи, Вакили, Муслиу, Зејнулаи (Чешмеџиев 88′), Адили, Тодоровски (Радески 46′), Алими, Жуниор, Емини, Шефити (Ибраими 46′)
Тренер: Ќатип Османи
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
