Светскиот вицепрвак Хрватска слатко им се одмазди на Шпанците за убедливиот пораз (0-6) на гости и ги совлада со 3-2 на „Максимир“, со гол во судиското продолжение. Тин Једвај беше херојот на Хрватите, постигнувајќи два гола на овој меч, вклучувајќи го и победничкиот во третата минута од дополнителното судиско време.
Хрватска и претходно двапати водеше, со головите на Крамариќ и на Једвај, а израмнуваа Дани Себалјос и Серхио Рамос од пенал.
Белгија очекувано славеше над Исланд со 2-0, со двата гола на Мичи Батшуаји, и се наоѓа на чекор до првото место во групата 2 од Лигата А.
Босна и Херцеговина одигра без голови на гости против Австрија и избори пласман во елитната дивизија, а за нас интересен е триумфот (0-2) на Белорусија на гости против Луксембург. Со две победи на Македонија, нашата селекција најверојатно ќе биде домаќин во полуфиналето од плејофот.
Во Лигата Ц, Грција минимално ја совлада Финска со 1-0, а Унгарија со 2-0 беше подобра од Естонија.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
