Бојан Миовски нема да може да ја продолжи одличната серија игри од репрезентацијата на Македонија и во дресот на Џирона откако нашиот голгетер заработил повреда поради која нема да биде во комбинација за настап викендов.
Џирона гостува на лидерот Барселона, но како што јавуваат шпанските медиуми, Миовски нема да може да им помогне на своите соиграчи против големиот ривал. Како што пишува „Марка“, Македонецот се вратил од репрезентативните обврски со болка во коленото, поради што е донесена одлука да не се ризикува со негов настап, за да не дојде до уште посериозен проблем.
Деталните прегледи ќе покажат колку Бојан ќе отсуствува од терените, а останува надежта дека повредата е полесна и Миовски ќе биде „фит“ за завршницата на сезоната во Ла Лига, како и за јунските квалификациски средби на македонската репрезентација.
Тој одигра одлично на стартот од новиот квалификациски циклус, постигнувајќи голови и против Лихтенштајн и против Велс, а нема дилема дека Миовски ќе биде еден од главните адути на селекторот Милевски и за јунските натпревари во кои нашата селекција ќе се сретне со Белгија и со Казахстан.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
