Швајцарскиот олимписки комитет ја поддржа кандидатурата на градот Сион за организација на Зимските Oлимписки Игри во 2026. Претходно швајцарската јавност ги отфрли кандидатурите на Сент Мориц и на Давос, откако гласачите во кантонот Граубунден кој припаѓаат овие два града, гласаа против кандидатурата.
Сион ги исполни сите барања за кандидатурата на третите ЗОИ на кои Швајцарија би била домаќин, по двете зимски Олимпијади во Сент Мориц во 1928 и во 1948 година, соопштија од Швајцарскиот олимписки комитет.
Одлуката за кандидатурата официјално ќе биде ратификувана на 11 април во спортскиот парламент кој го сочинуваат 86 швајцарски спортски сојузи и Швајцарскиот олимписки комитет.
Меѓународниот олимписки комитет, домаќинот на ЗОИ 2026 ќе го избере во 2019, а потенцијални кандидати покрај Сион уште се и Калгари, Сапоро и Инсбрук.
Зимските олимписки игри во 2018 година ќе се одржат во Пјонгчанг, а домаќин на ЗОИ 2022 е Пекинг.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
