Македонските одбојкари продолжуваат со подготовките за историскиот прв настап на еден европски шампионат, па по двете контролни средби со Романија нашите репрезентативци денеска и в недела ќе одиграат пријателски натпревари со селекцијата на Шведска. Двете средби ќе се играат во СРЦ „Кале“ со почеток во 17.30 часот.
„Очекуваме поддршка на овој дуел на домашен терен, а ќе сториме се за да се оддолжиме и да стигнеме до триумф“ – порачуваат од македонскиот табор.
Тоа ќе биде уште една добра можност за селекторот Никола Матијашевиќ да ја провери формата на репрезентативците. Васе Михаилов поради стомачен вирус ги пропушти вчерашните тренинзи, а Марко Јуниор Стошиќ се уште ја санира повредата на стомачниот мускул.
По овој двомеч ќе следи дуел со Украина во полуфиналето од турнирот „Чајка“, а ден потоа ривал на македонските одбојкари ќе биде Белгија или Бугарија, во зависност од исходите на полуфиналните пресметки.
За 5 и 6 септември се закажани гостувања во Сент Полтен и две средби против репрезентацијата на Австрија, по што ќе следи и дебито на ЕП, на 12 септември во Љубљана против селекцијата на Финска.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
