Актуелниот кошаркар на членот на Евролигата, Хапоел Тел Авив, Антонио Блекни, се најде во центарот на голем скандал откако американското обвинителство го обвинува за учество во широка мрежа за местење натпревари во НЦАА и кинеската лига, за што наводно собрал 200.000 долари.
Антонио Блекни е меѓу 20-те обвинети во голем скандал со местење кошаркарски натпревари кој, според обвинителите од Филаделфија, траел од септември 2022 до февруари 2025 година и вклучувал натпревари на НЦАА и Кинеската кошаркарска асоцијација (ЦБА).
Според обвинението, Блекни, додека играл за Џангсу Драгонс во Кина, се согласил намерно да пропушти одредени натпревари за неговите соработници да можат да остварат профит од спортско обложување во САД.
Наводно, тој добил вкупно 200.000 долари за својата улога во местењата. Обвинителството тврди дека бил вклучен во шемата од Марвес Ферли и Шејн Хенен, кои потоа инвестирале големи суми пари во однапред договорени исходи.
Во еден натпревар во март 2023 година, Блекни постигна само 11 поени, што е далеку под неговиот просек во сезоната од над 32, додека неговиот тим беше поразен со дури 31 поен – сценарио што им донесе големи профити на обложувачите.
Исто така, се тврди дека Блекни се обидел да ги вклучи своите соиграчи во местењето, и дека по „успехот“ во Кина, групата се свртела и кон натпреварите од НЦАА, со цел да ги спречи тимовите да ги покриваат хендикепите од обложувањето.
Блекни, поранешен НБА играч и еден од најдобрите стрелци во ЦБА, игра во моментов за Хапоел Тел Авив кој се натпреварува во Евролигата. Тој има просек од 13,8 поени и 2,4 скока по натпревар.
Истрагата е во тек, а случајот веќе е етикетиран како еден од најголемите скандали во модерната историја на кошарката.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
