Скандал на младата ѕвезда на Реал пред очите на Чаби Алонсо: „Му се ближи крај меѓу ‘кралевите’…“

Реал Мадрид го победи Хетафе со 0-1 со многу мака, во меч во кој повторно немаше место на теренот за младата ѕвезда Ендрик. Тој полуде синоќа, во моментот кога Чаби Алонсо го врати од загревањето и предизвика скандал.

Тренерот Чаби Алонсо не го смета 19-годишниот Ендрик за важен фактор за својот тим и оваа сезона не доби ниту една секунда на теренот. Веќе се зборува многу за неговото заминување од клубот. Се споменува позајмица во Марсеј, преселба во Јувентус или друг италијански клуб, а синоќа, како што стојат работите, Ендрик си купи билет за да го напушти Мадрид.

Бразилецот долго се загреваше и чекаше Чаби Алонсо да му даде можност во моментите кога кралскиот клуб бркаше победа во предградието на Мадрид. Сепак, од настапот немаше ништо. Тренерот на Реал му покажа на Ендрик да седне на клупата. На 19-годишникот воопшто не му се допадна тоа и го шутна шишето со вода. Сето тоа го направи пред очите на тренерот.

„Ендрик го шутна шишето со вода откако му беше кажано да престане со загревањето и да се врати на клупата. Чаби Алонсо виде сè и воопшто не му се допадна реакцијата“, пренесуваат шпанските медиуми.

Со оглед на тоа што младиот напаѓач имаше проблеми со повреда, тој го одигра својот последен натпревар за „кралевите“ пред пет месеци. Тој сигурно не очекуваше таков статус во клубот што му плати речиси 50 милиони евра. Бразилецот не играше добро дури ни под претходниот тренер Карло Анчелоти. Добиваше мала минутажа, но често беше многу ефикасен.

Одигра 37 натпревари во дресот на Реал Мадрид откако пристигна од Палмеирас. Има учинок од седум гола и една асистенција. Тој дефинитивно не очекуваше дека Чаби Алонсо воопшто нема да остави простор за него. Има многу нервоза кај младиот напаѓач и нема да биде изненадување ако го напушти клубот во јануари.

Со оглед на тоа што Чаби Алонсо го виде она што го направи Ендрик, малку е веројатно дека ќе му се даде шанса да игра на следните натпревари.