Викендов во „Борис Трајковски“ успешно се одржа најголемиот спортски настан, таеквондо турнирот Skopje Open G1, на кој учество земаа 41 земја и повеќе од 1.000 натпреварувачи. Турнирот беше во организација на ТК Бутел, Македонската таеквондо федерација и ТК Рамус.
Во исклучително силна конкуренција, македонските таеквондисти остварија одлични резултати.
На првиот ден од Скопје Опен, младите таеквондисти освоија пет медали:
Ведрана Тунески (ТК Бутел) – сребрен медал со три победи
Ненад Целески (ТК Хваранг фист) – сребрен медал
Душица Бресалиева (ТК Штип) – сребрен медал со две победи
Теодор Стојановски (ТК Бутел) – бронзен медал со две победи
Антонио Негријовски (ТК Феникс) – бронзен медал
Во сениорска конкуренција, најдобриот македонски спортист Дејан Георгиевски блесна во полн сјај и ја покори светската таеквондо елита. Со четири доминантни победи – против Австриецот Абулда Алмагди, европскиот шампион и светски вице-шампион Иван Шапина, како и Пашко Божиќ, освојувач на европска и светска бронза – Георгиевски стигна до финалето, каде со убедливи 2-0 го совлада Израелецот Илиа Рудерман.
Со овој златен медал, Георгиевски освои нови бодови во трката за олимписка норма. Овој турнир уште еднаш потврди дека Македонија е значаен фактор на светската таеквондо сцена, додека Македонската таеквондо федерација останува цврсто посветена на создавање врвни резултати и континуирана поддршка на македонските таеквондисти.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
