Довчерашниот селектор на Италија, Лучиано Спалети отворено зборуваше за сите проблеми со кои се соочува изминатиов период низ фудбалската активност.
Италија имаше лош почеток на квалификациите за Светското првенство, бидејќи беа убедливо поразени од Норвешка. Тоа беше причината Фудбалската асоцијација да се раздели со Спалети, кој сето тоа го прими тешко.
„Фудбалот ми го уништи животот. Го сакам фудбалот повеќе од себеси и жртвував некои многу блиски луѓе поради него. Нема шанси да исчезне. Таа игра сè уште ме држи буден ноќе. Има големо влијание врз мене, бидејќи моите мисли постојано се враќаат на него. Понекогаш се чувствувам среќен, но тоа брзо се менува бидејќи се сеќавам на играта. Не успеав да ги убедам моите играчи дека ги сакам“ – разочаран е трофејниот тренер.
Тој мисли дека знае каде погрешил.
„На почетокот направив грешка кога инсистирав на чувство на припадност и идентитет. Ги замолив играчите да ја пеат химната, да имаат мотивациски извик пред секој тренинг. Сакав да им ја покажам гордоста што ја чувствував, но беше премногу.“
Спалети му ја донесе долгоочекуваната титула на Наполи, но очигледно не се раздели со Де Лаурентис во најдобри услови.
„На тој начин, му помогнав на Де Лаурентис да разбере дека за успех треба да ангажира одличен тренер, а не да зависи од него. Најголемата навреда што ја доживеав беше што не ни беше дозволено да имаме шампионска парада на улиците на Неапол. Ќе жалам за тоа засекогаш, а уште потешко ми е затоа што ги гледав снимките од забавата кога го освоија Скудетото минатата сезона. Побарав од некои играчи да ми испратат видео клипови, за да можам барем да почувствувам како изгледа погледот од автобусот кон публиката“ – вели Спалети.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
