Тренерот на Чукарички, Ненад Лалатовиќ ќе ја води младата репрезентација на Србија на Европското првенство во Полска, на шампионатот каде Србите се во група со Македонија. Лалатовиќ е именуван само за ЕП, а веднаш потоа Фудбалскиот сојуз на Србија ќе избира нов селектор, најверојатно Симо Круниќ.
Лалатовиќ ќе го наследи Томислав Сивиќ на клупата на селекцијата. Оваа одлука следи откако голем број тренери не го прифаќаа предизвикот да го водат тимот или, пак, некои не добија доверба од сојузот.
Прв пик за селектор беше Вељко Пауновиќ но тој одбра да работи во САД, а челниците на ФСС ги одби и Александар Станојевиќ, лут затоа што пред три години не беше именуван за селектор на сениорската репрезентација откако против неговиот избор се побунија челниците на Црвена Звезда.
Единствен тренер кој сам се нудел да биде селектор на младите е поранешниот тренер на Работнички, Драгољуб Беквалац, кој преку СМС пораки директно се нудел до претседател на ФСС, Славиша Кокеза.
Откако Кокеза изминатиов период очигледно го игнорирал, Беквалац стана и прв критичар на работата на ФСС но и на Ненад Лалатовиќ.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
