Македонскиот селектор Боби Милевски реализираше средба со најголемото македонско фудбалско име, фудбалерот на векот на Македонија, Дарко Панчев.
Пред продолжението на квалификацискиот циклус за пласман на ЕВРО 2024 и пресметките со Украина и Англија на „Олд Трафорд“, македонскиот селектор изминатиов период се одлучи на средби со истакнати домашни фудбалски имиња во насока на разговори околу иднината на македонскиот репрезентативен фудбал и желбата за континуирано продолжување на успесите од претходните години. Па, во таа насока и меѓусебната средба со македонската фудбалска легенда Дарко Панчев како и поранешниот директор на Вардар, од времето на најславните денови на најтрофејниот македонски клуб, и долгодишен истакнат фудбалски работник, Драган Томовски.
На средбата, без сомнение, фудбалски разговори околу квалификациите за ЕП 2024 и исклучително тешката група во која Македонија, покрај со Украина и со Англија, е уште и со Италија, но и на темите генерално за идните насоки на домашниот фудбал, подобрување на домашните натпреварувања, активната клупска работа со најмладите како начин и за идно континуирано одржување на квалитетот на националните тимови, почнувајќи од најмладите па се до сениорската репрезентација.
„Оваа средба е на мое задоволство и како начин за искажување поддршка за Благоја Милевски за се она што го прави за националниот тим. Баражите за пласман на СП 2022 и натпреварите против Италија и Португалија, без сомнение, се најголемиот успех на македонскиот репрезентативен фудбал во историјата, ако се погледне тежината и значењето на истите. Па, токму тие средби треба да бидат насока и мотив за се она што репрезентацијата ја очекува и во квалификациите за ЕП 2024 за кои Милевски и момците треба да добијат безрезервна поддршка од секој од нас“ – се дел од размислувањата на Дарко Панчев и во интервјуто за ЕКИПА кое ќе биде објавено пред јунскиот собир на националниот тим и натпреварите со Украина и со Англија.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
