Дарко Рајаковиќ сезонава дебитира како прв тренер во НБА-лигата откако српскиот стратег ја доби довербата на раководството на Торонто репторс.
Србинот е извонреден кошаркарски стратег, но се покажува и како голем човек откако беше обелоденета хуманитарната акција што тој и неговата сопруга Гага ја организираа за помош на три детски болници, од кои едната во Торонто, другата е клиника за истражување на детски болести во Мемфис, а третата во Белград.
Имено, Рајаковиќ покрена кампања за издвојување по 20 долари за секоја асистенција на неговиот тим во сезоната 2023/24. „Рептилите“ во просек имаат по 29,6 асистенции сезонава. Торонто досега има точно 1.302 асистенции, што е нешто повеќе од 26.000 долари, бројка што се очекува да биде удвоена ако се знае дека се наоѓаме на половина од сезоната во НБА-лигата.
Потег за секоја пофалба на српскиот стратег, кој на овој начин ги освои симпатиите на јавноста на северноамериканскиот континент.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
