Кошаркарите на Пелистер се решени да ја остават зад себе разочарувачката мини-серија од два порази (три во последните четири рунди од Супер-лигата) и викендов да се вратат на триумфални патеки.
„Зелено-белите“ утре со почеток во 17 часот ги очекува гостување во Кавадарци против Тиквеш, меч во кој избраниците на тренерот Даскаловски се мотивирани да одиграат стопроцентно, да стигнат до победата и да се обидат што поскоро да се вмешаат во борбата за највисок пласман.
Тиквеш е тим кој исто така не се наоѓа во најдобра форма, има четири порази во последните пет кола, воедно и ривал со кого Пелистер има добра традиција ако се знае дека битолчани имаат пет победи во низа во домашното првенство над противникот од Кавадарци.
„Ова е за нас меч на кој ќе мора да се победи, играме со екипа што има сопствени квалитети и никако не смее да биде потценета. Мораме да излеземе на терен со максимален докус, да имаме енергија да одиграме 40 минути на високо ниво ако сакаме да стигнеме до победата во Кавадарци. Одбраната не ни беше на посакуваното ниво на претходните средби, неделава работевме на одредени корекции и ако одиграме онака како што знаеме ќе се вратиме со два бода од Кавадарци“, вели Бобан Стајиќ, еден од најискусните и најдобрите поединци во таборот на Пелистер оваа сезона.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
