Александар Стефанов денеска и официјално беше избран за нов претседател на Ракометната Федерација на Македонија, добивајќи ја едногласно довербата на сите делегати кои беа присутни на денешното Изборно Собрание на РФМ.
„На ова столче седеле претседатели кои низ годините оставиле белег, сакам да им се заблагодарам на сите претходни претседатели кои оставиле тежина, за сите заедно и ден денеска ракометот како национален спорт да остане спорт број 1. Јас оваа функција ќе ја извршувам про боно, без никаков надомест, ќе сторам се за да продолжиме да остваруваме успеси на сите полиња“, нагласи Стефанов во своето прво обраќање како претседател на РФМ.
Претходно, новиот претседател ја презентираше својата претседателска кандидатура пред делегатите на Собранието на РФМ.
„Чест и задоволство, но исто така и голема обврска и одговорност е тука пред сите вас да ја претставам својата кандидатура за претседатело на РФМ. 26 години сум во ракометот, дел како играч, дел како генерален спонзор на РФМ, член на УО на ракометната федерација. Ракометот бил и ќе ми биде во иднина најголем мотив, најголема пасија и желба за тука во нашата држава да правиме се подобри услови за развојот на македонскиот ракомет. Продолжуваме, сакаме да направиме чекор напред, да обезбедиме систем што ќе донесе стабилност за развој и во наредниот период“, изјави Стефанов при претставувањето на кандидатурата“.
„Пред се, за да имаме здрава основа и успех, најважно е да поработиме на основната инфраструктура и нејзиниот развој. Тука, уште во првите две години во план е изградба на ракометен спортски дом на оваа федерација, што ќе ги згрижи сите младински и сениорски категории, сите клубови и чинители во ракометот кои имаат потреба од модерна сала за играње на домашни и меѓународни натпревари.
Околу спонзорството и финансиската издржливост на федерацијата, можам да најавам дека иднината ќе биде во сигурни раце, веќе разговарав со интернационални компании, сериозни спонзори кои се подготвени да помогнат да се одржи и финансиската стабилност на РФМ. Исто така, во план е изработка на софтвер што би се применил со стартот на новата натпреварувачка сезона со што би се олесниле административната и процедуралната работа околу регистрација на играчи, пријава и одјава на ракометари, за да се скратат бирократските процедури, а сите клубови би имале јасен увид во ситуацијата.
Поддршката на клубовите во женскиот ракомет е нешто што би сакал да го потенцирам, ќе најдеме генерален спонзор што ќе издвои средства и ќе им помогне на овие клубови за да привлечат што повеќе ракометарки уште од најмали години, каде што го имаме загубено приматот од женската одбојка“, истакна Александар Стефанов.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
