Столе Димитриевски е избран за најдобар голман во Топ 5 лигите во Европа за изминатиот викенд, во изборот што традиционално го прави шпанската новинска агенција ЕФЕ.
Изборот е апсолутно заслужен ако се знае дека Македонецот имаше меч за паметење против Реал Мадрид, успевајќи да ги запре „кралевите“ во нивните налети и да ја сочува мрежата незатресена на „Сантијаго Бернабеу“. Димитриевски го заврши мечот со пет успешни интервенции, четири од нив при обиди внатре од шеснаесетникот, за свој шести меч сезонава без примен гол во шпанската Ла Лига.
Во идеалниот тим за изминатиот натпреварување покрај Димитриевски се најдоа уште и Хакими (ПСЖ), Упамекано (Баерн М.), Грималдо (Баер Леверкузен), Араухо (Барселона), Мирети (Јувентус), Бруно Фернандеш (Манчестер Јунајтед), Родригез (Лас Палмас), Доку (Манчестер Сити), Дојбик (Џирона) и Кејн (Баерн Минхен).
„Македонскиот голман немаше потреба да реагира премногу за време на посетата на „Сантијаго Бернабеу“, но пресудни беа неговите две клучни одбрани во првото полувреме, првата кога излезе очи в очи со Валверде, и втората кога го запре Хозелу“, се вели во краткиот опис на ЕФЕ зошто Димитриевски е голман број 1 во Топ 5 лигите во Европа за изминатиот викенд.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
