Фудбалерите на Струга ТЛ се во победничка серија и се надеваат дека ќе ја продолжат и на денешното гостување против Тиквеш во Кавадарци во последното есенско коло (13 ч.)
На последните натпревари, во одлична форма игра Стефан Јевтоски, кој заедно со капитенот Буњамин Шабани и Бесмир Бојку, го сочинува „моторот“ на тимот на средината на теренот.
„Имаме серија победи, за која верувам дека ќе продолжи и во Кавадарци. Во моментов мислам дека сме најдобриот тим во лигата, па така, како и на секој друг натпревар, и против Тиквеш ќе играме за трите бода“, изјави Стефан Јевтоски.
Тој беше стрелец на натпреварите против Работнички и Башкими, па желбата на Јевтоски е да постигне гол и денеска против Тиквеш, иако признава дека тоа е помалку важно во споредба со трите бода што треба да и освои тимот.
„Головите се само награда за добрата работа што ја правиме на теренот. Секако дека би сакал повторно да постигнам гол, но разбирливо е дека најважни се трите поени од ова гостување“, додаде Јевтоски.
Натпреварот меѓу Тиквеш и Струга Трим Лум се игра денеска, со почеток од 13 часот, на Градскиот стадион во Кавадарци.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
