Доминацијата на Струмица на македонската одбојкарска сцена продолжи со нова титула за овој тим, кој со вечерашниот триумф во Штип по 11. пат беше крунисан како најдобар во мак-одбојката. Доколку во куп-финалето дозволија да бидат изненадени од големиот ривал, струмичани во овој плејоф беа подготвени за предизвикот, покажаа повеќе од противникот од Штип и заслужено ја добија оваа финална серија со 3-1 во победи.
Денешниот четврти меч мина во доминација на бранителот на трофејот, кој во долги периоди имаше целосна контрола и на крајот заслужено славеше со 1-3 во сетови. Струмица доминираше во првиот сет добивајќи го со 15-25, а во вториот се водеше далеку поизрамнета битка. Штипјани дури имаа и предност до самиот крај, но „сино-белите“ со серија поени во самата завршница направија целосен пресврт и поведоа со 0-2 во сетови (21-25).
Се чинеше дека победата ќе биде максимална откако гостите отворија со 2-7 и со 3-8 на почетокот од третиот сет. Сепак, домаќините покажаа карактер и не само што се вратија, туку и со голем пресврт стигнаа до првиот сет во мечот (25-21). Тоа беше се што штипјани успеаја да сторат бидејќи четвртиот сет мина во целосна доминација на Струмица, по што актуелниот првак славеше со 17-25 и ја одбрани титулата во македонскиот шампионат.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
