Одбојкарите на Струмица се наоѓаат на еден чекор до нова шампионска титула во македонското првенство откако во денешниот трет меч од финалната серија славеа над составот на Штип со 3-1 во сетови. „Сино-белите“ експресно се рехабилитираа од поразот од штипјани од пред неколку дена, одиграа квалитетен меч и заслужено стигнаа до тримф со кој поведоа со 2-1 во финалето кое се игра до три добиени меча.
Струмица од самиот почeток влезе во посакуваниот ритам, добивајќи го стартниот сет со 25-18. Гостите од Штип изненадија со извонреден настап во вториот сет, кога најпрвин се одлепија на 11-18, а ниту тајмаутот на домаќините не вроди со плод, па штипјани го добија вториот сет со 15-25.
Актуелниот првак сепак навреме се разбуди, веќе во третиот сет повторно почна да доминира и рутински го доби со 25-17, за во четвртиот да ја запечати победата со убедливи 25-15.
Четвртиот меч од оваа серија е закажан за четврток во салата во Штип, каде струмичани ќе ја имаат првата „меч-топка“ во борбата за титулата.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
