МЗТ Скопје денеска од 20 часот и 30 минути во СЦ „Јане Сандански“ го пречекува Студентски Центар во обид да ја запише првата победа по камбекот во АБА лигата. Аеродромци немаа среќa во воведот од сезоната во која се сретнаа со три претенденти за титула, но сега се е подготвено за славје на првиот триумф по повеќе од четири години.
Но, за истото „четата“ на Александар Петровиќ ќе мора да биде на врвот на својата задача против незгодниот противник кој е добро пополнет на сите позиции и одигра 30 минутен егал натпревар против Партизан. За триумф аеродромци ќе мораат да го исконтролираат скокот и да ги лимитираат лесни поени на противникот, а и да го сопре добриот проток на топката кој носи отворени обиди за три поени.
„Нашата цел е да истрчаме против Струдентски Центар и да одиграме најдобро и најцврсто што можеме во моментот. Потребна ни е таа прва победа во АБА, за нас самите, но и за навивачите кои ни даваат голема поддршка. Јас сум подготвен, а тренерот изминатиов период направи се за тимот да биде на посакуваното ниво, потребно за да се добие дуел во ова екстремно силно натпреварување“, изјави Бре Ајви, американскиот кошаркар во таборот на МЗТ Скопје.
Во центарот на вниманието ќе биде битката на американските бекови Мајкл Кафи од едната и Лорен Џексон од другата страна, но и шутерското шоу кое треба да го приредат Војдан Стојановски и Флечер Меги. А, ќе биде интересно и да го видиме одговорот на МЗТ Скопје во одбраната над Ивишиќ кој важи за еден од најперспективните кошаркари од неговата генерација.
МЗТ Скопје досега одигра само една средба против Студентски Центар, онаа во АБА2 лигата во сезоната 2020/21 кога црногорскиот состав запиша убедлива победа. Интересно, голем број на играчи од тој натпревар повторно ќе се најдат на теренот денеска. Меги, Павличевиќ, Славковиќ, Ивишиќ од едната и Крстевски, Магдевски, Стојановски од другата страна.
Славковиќ беше лидер на Студентски Центар на тој меч со 21 поен и реализација 5/7 за три поени, додека најрасположен во редовите на МЗТ Скопје беше Гравет кој имаше свое шоу, но не беше доволно за победа.
View this post on Instagram
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
