Првата препрека кон патот за Светското првенство што ќе се одржи во Алжир младинците успешно ја поминаа. Избраниците на Илија Темелковски од стартот на натпреварот ги демонстрираа своите квалитети и енормната разлика која ја направија на полувремето (8-16) им овозможи смирена игра во вториот дел и рутинско завршување за конечни 22-30.
Капитенот Филип Талески вели дека Полјаците биле добро анализирани на што се должи и одличниот резултат.
„Цело време на подготовките во Маврово како и тие овде во Скопје во мислите ни беше Полска бидејќи играме на домашен терен, а тие беа фаворити бидејќи завршија со подобар пласман од нас на Европското првенство. Максимално ги анализиравме, гледавме доста видеа од нив и им ги анализиравме слабите точки кои ги искористивме против нив. Не му дозволивме на левиот бек да ни дава лесни голови, го затворивме и тука се направи разликата. Одигравме една добра одбрана, имавме поддршка и од голманите. Дававме лесни голови особено од десната крилна позиција и во првото полувреме направивме голема разлика што ја одржавме до крајот“ – вели Талески.
Испитите не завршуваат само со победата над Полска. Следен противник е селекцијата на Португалија со која ракометарите утре ќе си ги одмерат силите. Талески ја смирува еуфоријата по одличниот настап на денешниот натпревар и вели дека
„Немаме никаква информација за Португалија бидејќи се фокусиравме само на Полска и немавме време да ги гледаме тука. Ќе го гледаме натпреварот и вечерва и утре ќе се подготвиме колку можеме да ги одиграме и тие 60 минути кои мислам дека се најважни иако имаме уште 120 минути до краот на квалификациите“ – заврши Талески.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
