ТФТ ја продолжи низата на победи на три едно по друго на прволигашката сцена откако на отварањето на 20. коло славеше на домашен терен против „фенерџијата“ Струмица со 92-82. Гостите имаа подобро отварање на натпреварот, но „сино-белото“ водство траеше само три минути по што фаворитската улогја ја потврдија домаќините за 14. победа во сезоната.
На крилја на Мамузиќ и Сучов, гостите од Струмица беа оние кои ја имаа иницијативата на отварањето на натпреварот за 2-8, но ТФТ не дозволи рано високо водство на противникот. „Црно-белите“ ги намалија грешките во нападот, ја кренаа реализцијата па се вратија и во натпреварот и поведоа со 23-19 по 10. минути игра. ТФТ продолжи да го диктира темпото и во продолжението од натпреварот, веќе во втората четвртина стигна до двоцифрнеа предност за 56-41 на полувремето, а задачата си ја заврши во третата четвртина во која во еден момент стигна и до највисоките +29 (76-47).
По истото избраниците на Давитков се „разбудија“, од минута во минута ја топеа предноста, во последната четвртина влегоа со негатива од 77-57, а преку добрата одбрана и високата реализација во нападот успеаја да намалат до 83-79, но немаа сили за неизвесен финиш.
Со „дабл-дабл“ од 16 поени и 14 асистенции лидер на ТФТ беше Костоски, 15 поени додаде Андерсон, а со 14 поени и 8 скока мечот го заврши Батрик. Двоцифрени беа и Николов и Мекбраер кои броеја до 11. Почетната петорка беше двоцифрена и кај Струмица, а како лидер се истакна Крстајиќ со 21 поен, 10 скока и 7 асистенции. 20 поени додаде Обуквелу, 17 Мамузиќ, а по 11 Волкановски и Сучов.
Со оваа победа избраниците на Боро Смилковски ја продолжија успешната трка за посакуваната трета позиција на табелата, додека Струмица останува на дното со само две победи.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
