Струга ТЛ се надева дека до крајот на првенството може да стигне до втората позиција во Првата македонска фудбалска лига, а тоа е можно само доколку влезе во нова победничка серија. По триумфот над Шкупи во минатото коло, стружани посакуваат нови три бода и од денешната пресметка против Тиквеш.
Младиот и талентиран Флоријан Рочи, кој беше еден од стрелците на последниот натпревар против Шкупи, вели дека тимот се наоѓа во добра форма.
„Ова е многу важен натпревар за нас, особено затоа што играме пред домашна публика. Верувам дека со максимална посветеност и нивна поддршка можеме да стигнеме до нова победа. Тимот се наоѓа во добра форма и мислам дека тоа ќе го покажеме на денешниот дуел со Тиквеш“, истакна Рочи, кој верува во себе и ветува уште поголем придонес за тимот секогаш кога ќе добие шанса.
„Секогаш се трудам да го дадам максимумот на секој натпревар на кој добивам шанса. Одлуката за минутажата е на тренерот, но јас ќе продолжам напорно да работам на тренинзите и да покажам дека заслужувам да бидам на теренот што е можно повеќе“, посочи младиот фудбалер.
Сепак, Тиквеш по поразот Силекс на домашен терен од 0-3, посакува да се врати на патеките на успехот и да се почне нова победничка серија.
„Нормално дека боли тоа што се случи на дуелот против Силекс. Не толку поради самиот пораз, туку поради фактот што се случи во Кавадарци. Сепак, можеби и требаше да ни се случи еден таков момент за да не „отрезни“ и да се спуштиме на земја. Сега, секако, одиме по позитивен резултат во Струга“ – изјави капитенот Александар Вареловски.
Натпреварот меѓу Струга Трим Лум и Тиквеш, од 27. коло во ПМФЛ, ќе се одигра на Градскиот стадион во Струга, со почеток од 15:30 часот.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
