Металург успеа да слави голем триумф над Загреб ППД (25-22) во натпреварот од СЕХА – лигата што се одигра во СЦ „Борис Трајковски“. Избраниците на Лино Червар беа аутсајдери пред стартот на мечот, но прикажаа одлична игра и го изненадија хрватскиот тим.
Загреб ППД подобро го започна мечот и оствари предност од четири гола (3-7). Во 18.минута Металург остана без својот пикер Пешевски, кој заработи црвен картон по еден дуел со противничката одбрана.
Но, избраниците на Лино Червар успеаја потполно да се вратат резултатски до крајот на првиот дел. Младиот голман Томовски застана на голот и одбрани неколку удари, а на спротивната страна, Обрадовиќ, Кузмановски и Нелоски погодуваа.
Во вториот дел, вистинска ренесанса на „металурзите“. Изградија предност од пет гола разлика (19-14), па иако Загреб ППД се доближи на два негатива, сепак, на крајот Металург стигна до голем триумф.
Младиот голман Мартин Томовски блескаше со 15 одбрани, а Филип Кузмановски и Немања Обрадовиќ постигнаа по пет гола во составот на Металург. Кај Загреб ППД, Мандалиниќ беше стрелец на седум погодоци.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
