Спортот понуди големи борби и предизвици, а клубовите и играчите покажаа храброст и одлучност во своите цели. Од историскиот златен медал на Ѓоковиќ на Олимпијадата во Париз, преку европската титула на Шпанија, историските резултати во француската престолнина, но и трката за паметење на Макс Ферстапен во Бразил.
ЕКИПА ги издвојува највпечатливите настани за 2024 година.
НОВАК ЃОКОВИЌ – НАЈДОБАР ТЕНИСЕР НА СИТЕ ВРЕМИЊА
Новак Ѓоковиќ иако во 2024 година не освои ниту еден турнир, ги разреши сите дилеми околу тоа кој е најдобар тенисер на сите времиња, со освојувањето на златниот медал на Летните олимписки игри во Париз. Единствениот голем трофеј кој му недостигаше на 24-кратниот гранд-слем шампион, како што сакаше судбината дојде на теренот на кој минатите две децении доминираше неговиот најголем ривал, Рафаел Надал. „Филип Шатрие“ во Париз сведочеше уште еднаш на неверојатен меч, меѓу Ѓоковиќ и Алкараз во кој во два тај-брејка, Србинот беше подобар, за освојување на златниот медал, кој беше негов единствен мотив во 2024 година.
ФУДБАЛОТ НЕ СЕ ВРАТИ ДОМА,НО ПОВТОРНО ПОБЕДИ – ШПАНИЈА Е ЕВРОПСКИ ШАМПИОН!
Фудбалската репрезентација на Шпанија ја одбележа годинава откако стигна до рекордната четвртата титула на континенталните првенства. „Црвената фурија“ во финалето на ЕП во Германија на „Олимпискиот стадион“ во Берлин славеше над Англија со 2-1.
Шпанците и повеќе од заслужено стигнаа до трофејот бидејќи остварија максимални седум победи, но и оставија најдобар впечаток на теренот тие месец дена во Германија. Шпанија поведе со 1-0 со голот на Нико Вилијамс во 47. минута.
Англичаните успеаја да израмнат на 1-1 преку Кол Палмер во 73. минута. Кога сите очекуваа продолженија се појави Ојарзабал кој со својот погодок во 86. минута донесе победа од 2-1 и четврта титула за „црвената-фурија“.
ПЕТТО ОЛИМПИСКО ЗЛАТО, ВО ШЕСТОТО УЧЕСТВО НА ЛОИ
На Летните олимписки игри во Париз, шесткратниот олимпиец Михаин Лопез Нуњез го победи Чилеанецот Јасмани Акоста Фернандез со 6-0 во финалето во грчко-римски стил во борење за мажи до 130 килограми, со што стана првиот машки борач кој освоил пет олимписки златни медали по ред во истата дисциплина. Претходно, Нуњез до златен медал стигнуваше и на игрите во Пекинг, Лондон, Рио и Токио. Покрај петте злата на ЛОИ, Нуњез има и пет златни медали на Светските првенства.
ТРКАТА ЗА ИСТОРИЈА НА ИНТЕРЛАГОС
Возачот на Ред Бул, Макс Ферстапен стигна до четвртата титула во низа во Формула 1 шампионатот, а клучната трка се случи на ГН на Бразил. Веројатно една од најдобрите извозени трки во поновата историја, во која Макс ги откажа своите ривали околу борбата за титулата. Ферстапен направи неверојатно чудо. Стартуваше од 17 позиција, и стигна на крај до 62. победа во кариерата. До излегувањето на безбедносното возило Окон од Алпин беше првопласиран, но Ферстапен го искористи моментот, го помина, а потоа возеше симултанка до крајот на трката.
На крајот сето ова Холанѓанецот го материјализираше со четврта титула, која веќе е историска.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
