На мака се познаваат јунаците, а Македонија денеска одигра токму така, јуначки. Не беше лесно психолошки да се крене тимот по фијаското против Египет, но „црвено-жолтите“ го сторија токму тоа, во првото полувреме покажаа знаци на живот, за во вториот дел да го покажат својот квалитет, но што е уште поважно – карактер и решителност да покажат дека се поквалитетни од јужноамериканскиот аутсајдер и да се пласираат во следната рунда.
Веќе многу се пишуваше за падот во квалитет што го носи смената на генерации, а во една таква ситуација формулата на успех е една и единствена – сите поединци да се подредат на колективот…
– Затоа што се уште го имаме Кире Лазаров, кој ќе погоди кога ќе е најважно.
– Затоа што Митревски влева доверба и сигурност со одбраните на голот.
-Затоа што Томовски блеска бранејќи пенали со кои ги откажува противниците.
-Затоа што Кузмановски презема одговорност, за продор, шут, асистенција… Некогаш и греши, но најважна е иницијативата.
– Затоа што на крило го добивме младиот Костески, со пет гола за едно полувреме.
-Затоа што на пивот покрај Стоилов го имаме и одличниот Пешевски, кој во вторите 30 минути ги излуде Чилеанците.
-Затоа што Крстевски влезе како „резерва“ на списокот, но денеска постигна два гола.
-Затоа што Димитриоски и по оној промашен зицер не загуби верба, па влезе на втор пивот и даде значаен гол.
-Затоа што Талески и кога не игра многу во напад е корисен во одбрана. Влезе при „егал резултат“ и токму со него во дефанзива беше направена клучната разлика.
Кога сите ќе имаат верба во себе, но и до оние крај нив, тогаш се создава моќен колектив. И тоа треба да е рецептот за наредните три натпревари, за да се покаже карактер и добра игра, без оглед на конечниот резултат.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
