ЦСКА Москва го претрпе вториот пораз на последните три домашни средби во Евролигата, губејќи на домашен терен од Олимпија Милано со резултат 57-67. Рускиот гигант не најде одговор за гранитната одбрана на италијанскиот вицепрвак, кој одлично ги затвори приодите кон сопствениот кош и на тој начин си го трасираше патот кон победата.
Милано одигра извонредно во првата четвртина, во која избраниците на Итудис постигнаа само 10 поени (10-23). ЦСКА беше подобар ривал само во втората четвртина (25-17), за Милано да доминира во преостанатиот дел од мечот. Русите не постигнаа ниту еден поен во првите три и пол минути од последната четвртина, период во кој италијанскиот гигант стигна до убедлива предност што ја претвори во рутинска победа во завршницата.
Очајниот шут од далечина (3/24 за тројка) беше една од главните причини за поразот, најефикасен кај ЦСКА беше Лундберг со 15 поени, додека стрелците на гостите од Милано ги предводеа Даниелс и Хол со по 13 постигнати поени.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
