Игор Тудор имаше причина за задоволство откако хрватскиот стратег дебитираше со победа на клупата на Јувентус, славејќи со минимални 1-0 на синоќешниот дуел со Џенова.
Јилдиз го постигна единствениот погодок, Јуве пропушти неколку одлични шанси и за втор гол, но она што особено го радуваше Тудор беше променетиот пристап на екипата во однос на претходните натпревари на „старата дама“.
„Имавме само два-три тренинзи комплетни заедно по враќањето на репрезентативците, така што не можев да направам премногу на тактички и на психолошки план. Ме радува пристапот, што сите излегоа на терен желни да дадат се од себе за да победат, тоа ни ги донесе бодовите. Јасно ми е дека тактиката што ја барам е целосно различна во однос на она на што момците се навикнати, јас сакам повертикален, поинтензивен фудбал, верувам дека ќе бидеме се подобри и подобри како што ќе минува времето“, истакна новиот тренер на Јувентус.
Еден играч кој одигра далеку под своето ниво беше Копмајнерс, кој беше заменет во второто полувреме.
„На сите им е јасно дека ова не е најдобар момент за Копмајнерс, но тоа не го менува фактот дека тој е одличен фудбалер што со години игра на највисоко ниво во Серија А. Тој е добро момче, напорно работи, има толку силен шут. Свесен сум дека ќе мораме да го вратиме во ритам, ќе се погрижам тоа да се случи“, порача Тудор.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
