Македонската млада селекција е поразена од Франција. Французите потешко од очекувањата, ја оправдаа улогата на фаворит во Скопје, и тоа со „подарок“ гол по лошата реакција на Јован Манев. Му „асистираше“ на Калулу кој погоди во голот на Денковски, за конечна победа. Имаше Македонија своја шанса, особено во првиот дел преку Илиевски, но во последен миг одбрани Меслие.
Прво полувреме во егал. Две шанси, по една на двете страни. Диоп имаше прилика за гостите, додека Илиевски се закани за Македонија, но мрежите мируваа. Франција напаѓаше, Македонија успешно се бранеше и чекаше шанса за против напад. Сепак, одбраната и голманоте Денковски беа на висината на задачата.
Во вториот дел Франција тешко доаѓаше до шанси. Имаа свои пет минути Французите таму некаде кај 65. Минута кога имаа три шанси, но во два наврати одбрани Денковски одлично во ударите на Шерки и Муинга.
Следуваше „кобната“ 75. минута. Една навидум безопасна топка во средината, која што се чинеше дека лесно ќе биде отстранета, сепак, Манев реагира лошо, само до Калулу кој што погоди во голот на Денковски и ги однесоа бодовите.
Во финишот од средбата немаше многу шанси. Македонија тешко доаѓаше до прилика, и покрај тоа што Канатларовски уфрли се во напад во финишот. Франција се одбрани, па така фаворитот ги однесе бодовите.
Ова е втор пораз на Македонија во квалификациите, со кој ги намали шансите за пласман на едно од првите две места, додека Франција се зацврсти на првото место.
КВАЛИФИКАЦИИ У-21
МАКЕДОНИЈА – ФРАНЦИЈА 0-1 (0-0)
Национална Арена „Тодор Проески“ во Скопје.
Гледачи: 2.000
Судија: Арда Кардешлер (Турција).
Стрелци: Калулу 75’
Ж. Картони: Младеновски, Манев (М) – Камавинга, Труфе (Ф)
МАКЕДОНИЈА: Денковски, Шеји, Младеновски, Манев, Хајдари, Антовски (83’ Скендери), Адем (83’ Станковски), Фазлагиќ, Гроздановски (92’ Максимов), Воша (71’ Рамадани), Илиевски (70’ Ѓорѓиевски).
ФРАНЦИЈА: Меслие, Калулу (79’ Густо), Салиба, Бадиашил, Труфе, Шерки (68’ Нгуму-Минполе), Какере, Камавинга (85’ Шотар), Адли (79’ Турам), Диоп (68’ Ле Фе), Далимуендо-Муинга.
6. коло
Украина – Србија 2-1
Македонија – Франција 0-1
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
