Се поголеми се главоболките на Ергин Атаман откако Панатинаикос претрпе уште еден пораз, овојпат на домашен терен од Валенсија со резултат 79-89. „Зелено-белите“ почнаа добро, но како што одминуваше времето така Валенсија преземаше контрола над играта и резултатот, на крајот заслужено стигнувајќи до триумф на жешкиот терен.
Новиот македонски репрезентативец Омари Мур одигра добар меч со 9 поени, 5 скока, 4 асистенции и 2 украдени топки, најефикасен во победничкиот тим беше Томпсон со 19 поени. Нан со 23 поени беше прв стрелец на ПАО, додека Шортс го заврши мечот со 19 поени и 6 асистенции.
Басконија ја прекина серијата слаби резултати со победа на домашен терен над Олимпија Милано со 88-78. Луваву Кабаро беше херој на шпанскиот тим со 21 поен, три повеќе од Спањоло.
Најнеизвесно вечерва беше во Болоња, каде Виртус по голема драма славеше над Дубаи со 79-78. Вилдоза беше херојот на италијанскиот тим со тројката за победа на дваесетина секунди до крајот, потоа и украдена топка од Петрушев при последниот напад на гостите.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
